ਬ੍ਰਹਮ ਕਵਚ, ਪੰਥ, ਅਤੇ ਤੂੰ-ਤੂੰ ਮੈਂ-ਮੈਂ
ਪਿਛਲੇ ਕੁਝ ਸਮੇਂ ਤੋਂ ਪੰਥ ਵਿਚ 'ਬ੍ਰਹਮ ਕਵਚ' ਬਾਰੇ ਚਰਚਾ ਚੱਲ ਰਹੀ ਹੈ । ਇਸ ਵਿਚ ਬ੍ਰਹਮ ਕਵਚ ਦਾ ਬਾਣੀ ਹੋਣ ਜਾਂ ਨਾ ਹੋਣ ਬਾਰੇ ਤੇ ਚਰਚਾ ਘੱਟ ਤੇ ਇਕ ਦੂਜੇ ਉੱਤੇ ਵਾਰ ਅਤੇ ਤੂੰ-ਤੂੰ ਮੈਂ-ਮੈਂ ਜ਼ਿਆਦਾ ਹੋ ਰਹੀ ਹੈ । ਇਹ ਬਹੁਤ ਹੀ ਚਿੰਤਾਜਨਕ ਮੁੱਦਾ ਹੈ । ਪੂਰੇ ਸੰਸਾਰ ਦੇ ਵਿਚ ਇਹ ਗੱਲਾਂ ਜਾ ਰਹੀਆਂ ਹਨ, ਅਤੇ ਇਸ ਨਾਲ ਪੰਥ ਦਾ ਕੋਈ ਜ਼ਿਆਦਾ ਇੱਜ਼ਤ-ਮਾਣ ਨਹੀਂ ਵੱਧ ਰਿਹਾ ਸਗੋਂ ਉਹ ਲੋਕ ਜੋ ਸਿੱਖਾਂ ਨੂੰ ਆਪਸ ਵਿਚ ਲੜ੍ਹਨਾ ਦੇਖਣਾ ਚਾਹੁੰਦੇ ਹਨ ਉਹ ਜ਼ਰੂਰ ਖ਼ੁਸ਼ ਹੋ ਰਹੇ ਨੇ ।
ਗਿਆਨੀ ਹਰਨਾਮ ਸਿੰਘ ਧੁੰਮਾ ਹੋਣਾ ਨੇ ਕਥਾ ਕਰਦੇ ਹੋਏ ਇਹ ਕਿਹਾ ਸੀ ਕਿ ਬ੍ਰਹਮ ਕਵਚ, ਉਗਰਦੰਤੀ ਅਤੇ ਗੋਬਿੰਦ ਗੀਤਾ ਗੁਰੂ ਗੋਬਿੰਦ ਸਿੰਘ ਜੀ ਦੀਆਂ ਰਚਨਾਵਾਂ ਨਹੀਂ ਹਨ ।[1] ਇਸ ਤੋਂ ਇਹ ਸਾਰਾ ਮੁੱਦਾ ਸ਼ੁਰੂ ਹੋਇਆ । ਜੋ ਇਨ੍ਹਾਂ ਨੂੰ ਬਾਣੀਆਂ ਮੰਨਦੇ ਨੇ ਉਨ੍ਹਾਂ ਬਾਬਾ ਹਰਨਾਮ ਸਿੰਘ ਹੋਣਾ ਨੂੰ ਮੰਦਾ ਬੋਲਿਆ ਕਿ ਸ਼ਹੀਦੀ ਦਿਨਾਂ ਦੇ ਵਿਚ ਇਹ ਮੁੱਦੇ ਨਹੀਂ ਚੁੱਕਣੇ ਚਾਹੀਦੇ ਸਨ । ਪਰ ਇਹ ਕਹਿਣਾ ਕਿ ਇਹ ਜਾਣਬੁਝ ਕੇ ਕੀਤਾ ਗਿਆ ਸੀ, ਇਹ ਮੰਨਣਯੋਗ ਨਹੀਂ ਜਾਪਦਾ ।
ਸੂਰਜ ਪ੍ਰਕਾਸ਼ ਦੀ ਰਾਸ ਤੀਸਰੀ ਅਤੇ ਅਧਿਆਇ ਛਿਆਹਠਵੇਂ ਦੀ ਕਥਾ ਕਰਦੇ ਹੋਏ ਹਰਬੰਸ ਤਪੇ ਦਾ ਪ੍ਰਸੰਗ ਆਇਆ ਕਿ ਕੁਝ ਸਿੱਖਾਂ ਨੇ ਉਸਨੂੰ ਕਿਹਾ ਕਿ ਭਾਈ ਗੁਰਦਾਸ ਜੀ ਦੀ ਬਾਣੀ ਨਹੀਂ ਪੜ੍ਹਨੀ ਚਾਹੀਦੀ, ਸਿਰਫ਼ ਗੁਰਬਾਣੀ ਪੜ੍ਹੀ ਜਾਵੇ । ਇਸਨੂੰ ਸੁਲਝਾਉਣ ਦੇ ਲਈ ਉਹ ਗੁਰੂ ਅਰਜਨ ਦੇਵ ਜੀ ਕੋਲ ਚਲੇ ਗਏ ਤੇ ਗੁਰੂ ਸਾਹਿਬ ਨੇ ਕਿਹਾ ਕਿ ਇਹ ਪੜ੍ਹਨੀ ਚਾਹੀਦੀ ਹੈ । ਜਦੋਂ ਇਸ ਲੈਅ ਦੇ ਵਿਚ ਦੇਖੀਏ ਤਾਂ ਉਨ੍ਹਾਂ ਬਾਣੀਆਂ ਨੂੰ ਜੋ ਟਕਸਾਲ ਪ੍ਰਵਾਨ ਨਹੀਂ ਕਰਦੀ, ਜਾਂ ਜੋ ਟਕਸਾਲ ਮੁਖੀ ਨੂੰ ਸਹੀ ਨਹੀਂ ਲੱਗਦੀਆਂ, ਉਹ ਆਪਣੇ ਆਪ ਇਥੇ ਆ ਜੁਣਨਗੀਆਂ । ਇਹ ਕੋਈ ਨਵੀਂ ਗੱਲ ਨਹੀਂ । ਕਥਾ ਦੇ ਨਾਲ ਜੁੜ੍ਹਦੀਆਂ ਕਈ ਗੱਲਾਂ ਕਹਿ ਦਿੱਤੀਆਂ ਜਾਂਦੀਆਂ ਹਨ । ਜਾਣਬੁਝ ਕੇ ਇਹ ਕਿਹਾ ਗਿਆ ਜਾਂ ਸ਼ਹੀਦੀਆਂ ਦੇ ਦਿਨਾਂ ਵਿਚ ਕਿਹਾ ਗਿਆ ਨਿਰਮੂਲ ਜਿਹਾ ਲੱਗਦਾ ਹੈ ਜਦੋਂ ਪੂਰੀ ਕਥਾ ਨੂੰ ਸੁਣਿਆ ਜਾਵੇ ।
ਜਦ ਮੁੱਦਾ ਥੋੜ੍ਹਾ ਜਾ ਗ਼ਰਮਾਇਆ ਤਾਂ ਬਾਬਾ ਹਰਨਾਮ ਸਿੰਘ ਹੋਣਾ ਨੇ ਇਹ ਕਹਿ ਕੇ ਆਪਣੀ ਗੱਲ ਨੂੰ ਸਹੀ ਦਰਸਾਇਆ ਕਿ ਇਹ ਦਸਮ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬਾਣੀ ਵਿਚ ਨਹੀਂ ਹਨ । ਜੇਕਰ ਇਹ ਬਾਣੀਆਂ ਗੁਰੂ ਸਾਹਿਬ ਦੀਆਂ ਹੁੰਦੀਆਂ ਤਾਂ ਸੋਧਕ ਕਮੇਟੀ ਵੱਲੋਂ ਇਹ ਬਾਣੀਆਂ ਦਰਜ਼ ਕੀਤੀਆਂ ਜਾਣੀਆਂ ਸਨ, ਪਰ ਅਜਿਹਾ ਨਹੀਂ ਹੋਇਆ । ਹਾਂ, ਪਹਿਲੀ ਜੂਨ ਦੀ ਕਥਾ ਵਿਚ ਉਨ੍ਹਾਂ ਇਹ ਜ਼ਰੂਰ ਕਿਹਾ ਕਿ ਬ੍ਰਹਮ ਕਵਚ ਦੀ ਹੋਂਦ ਕਿਵੇਂ ਹੋਈ । ਗੋਬਿੰਦ ਗੀਤਾ ਬਾਰੇ ਕਿਹਾ ਕਿ ਇਹ ਜਿਵੇਂ ਕ੍ਰਿਸ਼ਨ ਜੀ ਨੇ ਗੀਤਾ ਉਚਾਰੀ ਹੈ ਓਵੇਂ ਹੀ ਇਹ ਹੈ । ਪਰ ਇਹ ਇਸ ਕਰਕੇ ਰੱਦ ਨਹੀਂ ਕੀਤੀ ਜਾ ਸਕਦੀ ਕਿਉਂਕਿ ਇਹ ਭਗਵਤ ਗੀਤਾ ਨਾਲ ਮਿਲਦੀ ਹੈ । ਗੁਰੂ ਸਾਹਿਬ ਨੇ ਦਸਮ ਗੁਰੂ ਗ੍ਰੰਥ ਸਾਹਿਬ ਵਿਚ ਕਈ ਤਰ੍ਹਾਂ ਦੇ ਅਨੁਵਾਦ ਕਰਕੇ ਲਿਖੇ ਹਨ, ਜੋ ਹੈ ਤਾਂ ਪੁਰਾਣੇ ਗ੍ਰੰਥਾਂ ਵਿਚੋਂ ਹੀ, ਪਰ ਗੁਰੂ ਸਾਹਿਬ ਨੇ ਲਿਖਿਆ ਆਪਣੇ ਤਰੀਕੇ ਨਾਲ ।
ਖ਼ੈਰ, ਇਹ ਮੁੱਦਾ ਬਾਣੀਆਂ ਨੂੰ ਨਾ ਲੈ ਕੇ ਇਕ-ਦੂਜੇ ਉੱਪਰ ਬਿਆਨਬਾਜ਼ੀ ਕਰਨ ਦਾ ਬਣ ਗਿਆ । ਇਸ ਵਿਚ ਕਈ ਤਰ੍ਹਾਂ ਦੇ ਨਾਂ ਜ਼ਰੂਰ ਆਏ: ਗੁਰਪ੍ਰੀਤ ਸਿੰਘ ਕੈਲੀਫ਼ੋਰਨੀਆਂ, ਬਾਬਾ ਬੰਤਾ ਸਿੰਘ, ਬਾਬਾ ਜੀਵਾ ਸਿੰਘ, ਮਨਿੰਦਰ ਸਿੰਘ ਮਾਹਲ, ਆਦਿ । ਗੁਰਪ੍ਰੀਤ ਸਿੰਘ ਹੋਣਾ ਬਾਰੇ ਵੀ ਬਹੁਤ ਕੁਝ ਬੋਲਿਆ ਗਿਆ ਸੀ ਕੁਝ ਸਮਾਂ ਪਹਿਲਾਂ । ਉਸ ਦੀਆਂ ਪੁਰਾਣੀਆਂ ਕੱਟੇ ਹੋਏ ਵਾਲਾਂ ਦੀਆਂ ਫ਼ੋਟੋਆਂ ਪਾ ਕੇ ਇਹ ਦਰਸਾਇਆ ਗਿਆ ਸੀ ਕਿ ਇਹ ਆਰ.ਐੱਸ.ਐੱਸ ਦਾ ਬੰਦਾ ਹੈ ਤੇ ਇਸਦਾ ਨਾਉਂ ਨੀਰਜ ਸ਼ਰਮਾ ਹੈ । ਇਹ ਇਕ ਵਾਰ ਤੋਂ ਬਿਨ੍ਹਾਂ ਹੋਰ ਕੁਝ ਨਹੀਂ ਜਾਪਦਾ ਤੇ ਨਾ ਹੀ ਇਸ ਵਿਚ ਕੋਈ ਸੱਚਾਈ ਜਾਪਦੀ ਹੈ । ਸਿਰਫ਼ ਦਸਮ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬਾਣੀ ਦੀ ਗੱਲ ਕਰਨ ਕਰਕੇ ਗੁਰਪ੍ਰੀਤ ਸਿੰਘ ਨੂੰ ਆਰ.ਐੱਸ.ਐੱਸ ਦਾ ਬੰਦਾ ਕਿਹਾ ਗਿਆ । ਆਰ.ਐੱਸ.ਐੱਸ ਇਕ ਹਊਆ ਜਾ ਬਣਾ ਦਿੱਤਾ ਹੈ । ਜਦੋਂ ਵੀ ਕੋਈ ਗੱਲ ਹੋਵੇ ਜਿਸ ਨਾਲ ਤੁਸੀਂ ਸਹਿਮਤ ਨਾ ਹੋਵੋਂ ਤਾਂ ਇਸਨੂੰ ਆਰ.ਐੱਸ.ਐੱਸ ਦੀ ਦੇਣ ਕਹਿਣ ਲੱਗ ਜਾਂਦੇ ਹੋ । ਹਾਂ, ਇਨ੍ਹਾਂ ਤੇ ਧਿਆਨ ਵੀ ਰੱਖਣਾ ਚਾਹੀਦਾ ਹੈ ਤੇ ਇਨ੍ਹਾਂ ਦੀਆਂ ਕੁਤਰਕਾਂ ਦਾ ਮੂੰਹ-ਭੰਨ ਜਵਾਬ ਵੀ ਦੇਣਾ ਚਾਹੀਦਾ ਹੈ, ਪਰ ਹਰ ਇਕ ਗੱਲ ਏਜੰਸੀਆਂ ਤੇ ਆਰ.ਐੱਸ.ਐੱਸ ਨਾਲ ਨਹੀਂ ਜੋੜ੍ਹੀ ਜਾ ਸਕਦੀ ।
ਗੁਰਪ੍ਰੀਤ ਸਿੰਘ ਅਤੇ ਇਨ੍ਹਾਂ ਦੀ ਘਰਵਾਲੀ ਤੇ ਕਈ ਤਰ੍ਹਾਂ ਦੇ ਇਲਜ਼ਾਮ ਲਗਾਏ ਗਏ, ਜੋ ਇਨ੍ਹਾਂ ਮੁਤਾਬਕ ਮਹਿਤੇ ਵਾਲਿਆਂ ਦੇ ਬੰਦਿਆਂ ਦੇ ਕੰਮ ਸਨ । ਫਿਰ ਗੁਰਪ੍ਰੀਤ ਸਿੰਘ ਹੋਣਾ ਵਲੋਂ ਵੀ ਕਈ ਪ੍ਰਕਾਰ ਦੀਆਂ ਗੱਲਾਂ ਕੀਤੀਆਂ ਗਈਆਂ ਬਾਬਾ ਬੰਤਾ ਸਿੰਘ, ਬਾਬਾ ਜੀਵਾ ਸਿੰਘ ਤੇ ਬਾਬਾ ਹਰਨਾਮ ਸਿੰਘ ਜੀ ਦੀਆਂ ਨਿੱਜੀ ਜ਼ਿੰਦਗੀਆਂ ਬਾਰੇ । ਕੁਝ ਤਾਂ ਅਜਿਹੀਆਂ ਗੱਲਾਂ ਸਨ ਜੋ ਸੁਨਣਯੋਗ ਨਹੀਂ ਸਨ ਤੇ ਨਾ ਹੀ ਲਿਖੀਆਂ ਜਾ ਸਕਦੀਆਂ ਹਨ । ਜਿਨ੍ਹਾਂ ਵੀ ਲੋਕਾਂ ਨੇ ਬਿਆਨਬਾਜ਼ੀ ਕੀਤੀ ਇਸ ਸਾਰੇ ਮੁੱਦੇ ਵਿਚ, ਲੋਕਾਂ ਦੀਆਂ ਨਿੱਜੀ ਜ਼ਿੰਦਗੀਆਂ ਬਾਰੇ, ਇਹ ਬਹੁਤ ਹੀ ਘਟੀਆਂ ਤਰੀਕੇ ਦੀ ਹਰਕਤ ਸੀ । ਕੋਈ ਵੀ ਪੰਥ ਦਾ ਮੁੱਦਾ ਹੋਵੇ, ਉਹ ਬਹੁਤ ਹੀ ਵਧੀਆ ਤਰੀਕੇ ਨਾਲ ਸੁਲਝਾਇਆ ਜਾ ਸਕਦਾ ਹੈ । ਘਰਵਾਲੀ ਜਾਂ ਪਿਤਾ ਨੂੰ ਘਸੀਟਨਾ ਇਸ ਵਿਚ ਕੋਈ ਸਮਝਦਾਰੀ ਵਾਲੀ ਗੱਲ ਨਹੀਂ ।
ਆਪਣੀਆਂ ਕੁਝ ਗੱਲਾਂ ਨੂੰ ਲੈ ਕੇ ਵਖਰੇਵੇਂ ਹੋ ਸਕਦੇ ਨੇ, ਪਰ ਪੂਰੀ ਸੰਪਰਦਾ ਨੂੰ ਹੀ ਨਕਾਰਨ ਦੀਆਂ ਕੋਸ਼ਿਸ਼ਾਂ ਕਰਨੀਆਂ ਬਹੁਤ ਘਟੀਆਂ ਗੱਲ ਹੈ । ਹੁਣ ਜਦ ਕਈਆਂ ਦਾ ਬ੍ਰਹਮ ਕਵਚ ਨੂੰ ਲੈ ਕੇ ਬਾਬਾ ਹਰਨਾਮ ਸਿੰਘ ਹੋਣਾ ਨਾਲ ਵਿਰੋਧ ਹੋ ਗਿਆ, ਤਾਂ ਉਨ੍ਹਾਂ ਨੇ ਬਾਬਾ ਹਰਨਾਮ ਸਿੰਘ ਹੋਣਾ ਨੂੰ ਏਜੰਸੀਆਂ ਦਾ ਬੰਦਾ ਤੇ ਗੁੰਡਾ ਕਹਿਣਾ ਵੀ ਸ਼ੁਰੂ ਕਰ ਦਿੱਤਾ । ਜਾਂ ਟਕਸਾਲ ਦੀ ਹੋਂਦ ਗੁਰੂ ਗੋਬਿੰਦ ਸਿੰਘ ਜੀ ਤੋਂ ਹੋਈ ਤੋਂ ਹੀ ਮੁਕਰ ਰਹੇ ਨੇ । ਕਿਹੋ ਜਿਹੀ ਮਾਨਸਿਕਤਾ ਦਾ ਸ਼ਿਕਾਰ ਹੋ ਗਏ ਹਾਂ ਆਪਾਂ ਕਿ ਆਪਾਂ ਨੂੰ ਸਹੀ ਤੇ ਗ਼ਲਤ ਵਿਚ ਕੋਈ ਫ਼ਰਕ ਹੀ ਨਹੀਂ ਦਿਖ ਰਿਹਾ । ਜੋ ਗੱਲਾਂ ਕਰਕੇ ਲੋਕ ਸਿੱਖਾਂ ਵਿਚ ਪਾੜਾ ਪਾਉਣਾ ਚਾਹੁੰਦੇ ਸਨ, ਓਹੀ ਗੱਲਾਂ ਨੂੰ ਆਪਾਂ ਸੱਚ ਮੰਨ ਲਿਆ ਤੇ ਆਪਣੀ ਕੁੱਛੜ ਚੁੱਕ ਲਿਆ !
ਟਕਸਾਲ ਮਹਿਤਾ ਵੱਲੋਂ ਦੋ ਬਿਆਨ ਆਪਣੇ ਫ਼ੇਸਬੁਕ ਪੇਜ ਤੇ ਪਾਏ ਗਏ । ਇਹ ਪੇਜ ਤੋਂ ਹੀ ਸਿੱਧਾ ਪ੍ਰਸਾਰਣ ਹੁੰਦਾ ਹੈ, ਇਸ ਕਰਕੇ ਲੱਗਦਾ ਹੈ ਕਿ ਇਹ ਉਨ੍ਹਾਂ ਦਾ ਆਪਣਾ ਨਿੱਜੀ ਪੇਜ ਹੈ । ਪਹਿਲਾ ਬਿਆਨ (ਬਾਬਾ ਬਲਵੀਰ ਸਿੰਘ) ਬੁੱਢਾ ਦਲ ਵਲੋਂ ਹੈ ਕਿ ਗੁਰਪ੍ਰੀਤ ਸਿੰਘ ਹੋਣਾ ਵੱਲੋਂ ਹੱਦੋਂ ਬਾਹਰ ਜਾ ਕੇ ਬਿਆਨਬਾਜ਼ੀ ਕੀਤੀ ਗਈ । ਦੂਜਾ ਬਿਆਨ ਬਾਬਾ ਹਰਨਾਮ ਸਿੰਘ ਵਲੋਂ ਹੈ, ਇਸ ਵਿਚ ਵੀ ਗੁਰਪ੍ਰੀਤ ਸਿੰਘ ਬਾਰੇ ਗੱਲ ਹੋਈ ਹੈ ਕਿ ਉਹ ਅਖੌਤੀ ਵਿਦਵਾਨ ਹੈ ਅਤੇ ਕਿਹਾ ਗਿਆ ਹੈ ਕਿ ਬੁੱਢੇ ਦਲ ਅਤੇ ਬਾਬਾ ਬਲਵੀਰ ਸਿੰਘ ਬਾਰੇ ਕੋਈ ਬਿਆਨਬਾਜ਼ੀ ਨਾ ਕੀਤੀ ਜਾਵੇ ।
ਨਵੀਂ ਖ਼ਬਰ ਇਹ ਹੈ ਕਿ ਜਸਵਿੰਦਰ ਸਿੰਘ ਕੈਲੀਫ਼ੋਰਨੀਆਂ ਤੇ ਕੋਈ ਕੇਸ ਪਾ ਦਿੱਤਾ ਗਿਆ ਹੈ, ਜੋ ਹੁਣ ਪੰਜਾਬ ਆਇਆ ਹੋਇਆ ਹੈ । ਇਹ ਕੇਸ ਗੁਟਕਾ ਸਾਹਿਬ ਦੀ ਬੇਅਦਬੀ ਬਾਰੇ ਕਿਹਾ ਜਾ ਰਿਹਾ ਹੈ । ਇਕ ਗੁਟਕਾ ਦਿਖਾਇਆ ਗਿਆ ਸੀ ਜਿਸ ਵਿਚ ਇਹ ਕਿਹਾ ਗਿਆ ਸੀ ਕਿ ਇਹ ਗਿਆਨੀ ਜਰਨੈਲ ਸਿੰਘ ਖ਼ਾਲਸਾ ਭਿੰਡਰਾਂਵਾਲਿਆਂ ਦੇ ਸਮੇਂ ਤੋਂ ਹੈ ਅਤੇ ਇਸ ਵਿਚ ਬ੍ਰਹਮ ਕਵਚ ਵੀ ਹੈ । ਫਿਰ ਕੁਝ ਸਮੇਂ ਬਾਅਦ ਗਿਆਨੀ ਮੋਹਣ ਸਿੰਘ ਉਰਲਾਣਾ ਨੇ ਇਸਦਾ ਖੰਡਣ ਕੀਤਾ ਤੇ ਕਿਹਾ ਕਿ ਜੋ ‘ਲੋਗੋ’ ਹੈ ਦਮਦਮੀ ਟਕਸਾਲ ਦਾ ਉਹ ੧੯੯੬ ਵਿਚ ਤਿਆਰ ਹੋਇਆ ਹੈ, ਫਿਰ ਉਹ ਜਸਵਿੰਦਰ ਸਿੰਘ ਹੋਣਾ ਨੇ ਜੋ ਗੁਟਕਾ ਦਿਖਾਇਆ ਸੀ ਉਸ ਵਿਚ ਕਿਵੇਂ ਆ ਗਿਆ । ਦੂਜਾ ਨੁਕਤਾ ਇਹ ਉਠਾਇਆ ਗਿਆ ਕਿ ਜੋ ਗੁਟਕਾ ਸਾਹਿਬ ਜਸਵਿੰਦਰ ਸਿੰਘ ਹੋਣਾ ਨੇ ਦਿਖਾਇਆ ਸੀ ਉਸਦੇ ਅੰਗ ਅਜੇ ਵੀ ਚਿੱਟੇ ਪਏ ਸਨ, ਜੋ ਕੇ ਸੰਭਵ ਨਹੀਂ ਹੋ ਸਕਦਾ ਇੰਨੇ ਸਾਲਾਂ ਬਾਅਦ ।
ਜਸਵਿੰਦਰ ਸਿੰਘ ਕੈਲੀਫ਼ੋਰਨੀਆਂ ਨੇ ਅਲੱਗ-ਅਲੱਗ ਨੁੱਕਤਿਆਂ ਤੇ ਗੱਲਾਂ ਕੀਤੀਆਂ ਹਨ ਜਿਸ ਵਿਚ ਇਤਿਹਾਸ, ਗੁਰਬਾਣੀ ਤੇ ਮਰਯਾਦਾ ਦਾ ਕਈ ਵਾਰੀ ਜ਼ਿਕਰ ਹੋਇਆ ਉਸ ਦੀਆਂ ਵੀਡੀਓਆਂ ਦੇ ਵਿਚ । ਢੱਡਰੀ ਤੇ ਵੀ ਉਸ ਨੇ ਕਈ ਵੀਡੀਓਆਂ ਬਣਾਈਆਂ ਜਿਸ ਵਿਚ ਉਸ ਦੀਆਂ ਕੁਤਰਕਾਂ ਦੇ ਜਵਾਬ ਹੁੰਦੇ ਸਨ । ਕੈਲੰਡਰ ਬਾਰੇ ਉਸ ਦੀਆਂ ਵੀਡੀਓਆਂ ਬਾ-ਕਮਾਲ ਸੀ । ਪਰ ਇਥੇ ਕੁਝ ਸਹੀ ਜਾ ਨਹੀਂ ਲੱਗਿਆ ਉਹਨਾਂ ਦਾ, ਮੋਹਣ ਸਿੰਘ ਉਰਲਾਣਾ ਹੋਣਾ ਦੀਆਂ ਦਲੀਲਾਂ ਸੁਣਕੇ । ਹਾਂ, ਜਸਵਿੰਦਰ ਸਿੰਘ ਹੋਣਾ ਨੇ ਇਕ ਪੁਰਾਤਨ ਦਸਮ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੀੜ ਦੇ ਦਰਸ਼ਨ ਜ਼ਰੂਰ ਕਰਾਏ ਸਨ ਜੋ ਪਟਨਾ ਸਾਹਿਬ ਵਿਖੇ ਸੁਸ਼ੋਭਿਤ ਕਹੀ ਜਾਂਦੀ ਹੈ ਜਿਸ ਵਿਚ ਗੋਬਿੰਦ ਗੀਤਾ ਸੀ ।
ਇਸਦੇ ਨਾਲ ਹੀ ਕਈ ਲੋਕਾਂ ਨੇ ਇਕ ਖ਼ਬਰ ਦੀ ਫ਼ੋਟੋ ਵੀ ਦਿਖਾਈ ਜਿਸ ਵਿਚ ਇਹ ਕਿਹਾ ਗਿਆ ਕਿ ਬਾਬਾ ਹਰਨਾਮ ਸਿੰਘ ਧੁੰਮਾ ਹੋਣਾ ਨੇ ਕਿਹਾ ਕਿ ੧੧੦੦ ਤੋਂ ਉੱਤੇ ਅੰਗ ਦਸਮ ਦੀ ਬਾਣੀ ਦੇ ਗੁਰੂ ਸਾਹਿਬ ਦੀ ਰਚਨਾ ਨਹੀਂ । ਪਰ ਜਦ ਉਹ ਖ਼ਬਰ ਧਿਆਨ ਨਾਲ ਪੜ੍ਹੀ ਜਾਵੇ ਤਾਂ ਇਹ ਸਿੱਧ ਹੁੰਦਾ ਹੈ ਕਿ ਉਹ ਇਹ ਕਹਿ ਰਹੇ ਨੇ ਕੇ ਗੁਰੂ ਸਾਹਿਬ ਨੇ ਪੁਰਾਣੇ ਗ੍ਰੰਥਾਂ ਦਾ ਅਨੁਵਾਦ ਕੀਤਾ ਹੈ । ਬੜੀ ਮਾੜੀ ਗੱਲ ਇਹ ਹੈ ਕਿ ਗੁਰਪ੍ਰੀਤ ਸਿੰਘ ਹੋਣਾ ਨੇ ਵੀ ਇਹ ਖ਼ਬਰ ਨੂੰ ਸਾਂਝਾ ਕੀਤਾ ਜਸਵਿੰਦਰ ਸਿੰਘ ਹੋਣਾ ਵਾਲੀ ਖ਼ਬਰ ਨਾਲ । ਅਨਮੋਲ ਸਿੰਘ ਨੇ ਇਕ ਬਹੁਤ ਵਧੀਆ ਗੱਲ ਕਹੀ ਸੀ ਜਸਵਿੰਦਰ ਸਿੰਘ ਬਾਰੇ ਕਿ ਨਫ਼ਰਤ ਵੱਸ ਹੋਕੇ ਕੰਮ ਨਹੀਂ ਕਰਨੇ ਚਾਹੀਦੇ । ਮੈਂ ਸਮਝਦਾ ਕਿ ਇਹ ਸਭ ਤੇ ਲਾਗੂ ਹੁੰਦੀ ਹੈ ।
ਕਈ ਸਿੰਘ ਇਹ ਕਹਿ ਦਿੰਦੇ ਨੇ ਕਿ ਮਰਯਾਦਾ ਕਦੇ ਵੀ ਇਕ ਨਹੀਂ ਹੋ ਸਕਦੀ । ਜੇਕਰ ਇਸ ਨੂੰ ਮੰਨ ਲਿਆ ਜਾਵੇ ਤਾਂ ਇਹ ਮੁੱਦੇ ਜੋ ਹੁਣ ਖੜ੍ਹੇ ਹੋ ਰਹੇ ਨੇ ਇਸਦਾ ਕੋਈ ਵੀ ਰਾਹ ਨਹੀਂ ਲੱਭੇਗਾ । ਕੋਈ ਕਿਸੇ ਨੂੰ ਮੰਨ ਲਵੇਗਾ, ਕੋਈ ਕਿਸੇ ਨੂੰ । ਸੋ ਮੇਰਾ ਇਹ ਮੰਨਣਾ ਹੈ ਕਿ ਸਾਰੀਆਂ ਧਿਰਾਂ ਨੂੰ ਆਪਸ ਦੇ ਵਿਚ ਬੈਠ ਕੇ ਵਿਚਾਰ ਕਰਨੀ ਚਾਹੀਦੀ ਹੈ ਤੇ ਸੰਪਰਦਾਵਾਂ ਉੱਤੇ ਬਿਆਨਬਾਜ਼ੀ ਬੰਦ ਹੋਣੀ ਚਾਹੀਦੀ ਹੈ । ਇਸ ਨਾਲ ਕੋਈ ਨਾ ਕੋਈ ਰਾਹ ਜ਼ਰੂਰ ਨਿੱਕਲ ਜਾਵੇਗਾ । ਔਨਲਾਈਨ ਸੋਸ਼ਲ ਮੀਡੀਏ ਤੇ ਹਰ ਦਿਨ 'ਲਾਈਵ' ਆ ਕੇ ਬਿਆਨ ਦੇਣਾ ਤੇ ਭੰਡੀਪ੍ਰਚਾਰ ਕਰਨਾ ਕੋਈ ਗੁਰਮੁਖਾਂ ਵਾਲੇ ਕੰਮ ਨਹੀਂ ਹਨ । ਜੋ ਮੰਨਦਾ ਹੈ ਬ੍ਰਹਮ ਕਵਚ, ਉਗਰਦੰਤੀ ਤੇ ਗੋਬਿੰਦ ਗੀਤਾ ਨੂੰ ਉਹ ਆਪਣੀ ਦਲੀਲ ਦੇਵੇ, ਜੋ ਨਹੀਂ ਮੰਨਦਾ ਉਹ ਆਪਣਾ ਪੱਖ ਰੱਖੇ ।
ਅਖ਼ੀਰ ਤੇ ਇਹ ਕਹਾਂਗਾ ਕਿ ਉਗਰਦੰਤੀ ਤੇ ਬ੍ਰਹਮ ਕਵਚ ਬਾਰੇ ਇਹ ਸੁਣਿਆ ਸੀ ਕਿ ਇਹ ਬਾਣੀਆਂ ਸ਼ਹੀਦ ਸਿੰਘਾਂ ਵੱਲੋਂ ਪ੍ਰਗਟ ਕੀਤੀਆਂ ਗਈਆਂ ਸਨ । ਤੇ ਓਦੋਂ ਤੋਂ ਹੀ ਪੰਥ ਇਹ ਪੜ੍ਹ ਰਿਹਾ ਹੈ । ਹਾਂ ਇਹ ਸ਼ਾਇਦ ਹੋ ਸਕਦਾ ਹੈ ਕਿ ਟਕਸਾਲ ਵਿਚ ਇਹ ਨਾ ਪੜ੍ਹਾਈਆਂ ਜਾਂਦੀਆਂ ਹੋਣ ਜਾਂ ਸੰਥਿਆ ਇਨ੍ਹਾਂ ਦੀ ਨਾ ਦਿੱਤੀ ਜਾਂਦੀ ਹੋਵੇ । ਇਹ ਗੁਪਤ ਬਾਣੀਆਂ ਕਰਕੇ ਵੀ ਜਾਣੀਆਂ ਜਾਂਦੀਆਂ ਹਨ । ਦੋਨਾਂ ਧਿਰਾਂ ਨੇ ਆਪਣੇ-ਆਪਣੇ ਵਿਚਾਰ ਤੇ ਨੁੱਕਤੇ ਰੱਖ ਦਿੱਤੇ ਨੇ, ਪਰ ਫਿਰ ਵੀ ਕਈ ਇਹੋ ਜਿਹੇ ਲੋਕ ਨੇ ਜੋ ਹਰ ਰੋਜ਼ 'ਲਾਈਵ' ਆ ਕੇ ਇਕ-ਦੂਜੇ ਨੂੰ ਨੀਚਾ ਦਿਖਾਉਣ ਲੱਗ ਜਾਂਦੇ ਨੇ ਜੋ ਕਿ ਬਹੁਤ ਮਾੜੇ ਤੇ ਹਉਮੈ-ਗ੍ਰਸਤ ਲੋਕਾਂ ਦੀ ਨਿਸ਼ਾਨੀ ਹੈ ।
No comments:
Post a Comment